COMUNICAT DE LIBERTAT! VAL D’ARAN EN CONTRA DERA ESPECULACION URBANISTICA

Aran qu’ei un país qu’a experimentat un creishement economic fòrça gran en fòrça pòc temps. En uns 20 ans es aranesi qu’an cambiat radicauments era sua manèra de guanhar-se es sòs. Actuauments apoiridíem díder que quasi tota era Val viu dera nhèu, de manèra dirècta o indirècta. Eth hèt de víuer unicaments deth torisme dera nhèu a comportat granes operacions immobiliàries. Eth nombre de dusaus residéncies ei enòrme e eth consum de solèr ei exorbitat. Dintram, donques, ena dinamica desfrenada qu’a dejà produsit vertadères catastròfes economiques, ecologiques e sociaus.

Guardem qué a passat en d’autes zònes toristiques desprotegides deth creishement descontrarotlat: era corrupcion des ajuntaments per part d’enterpreses especuladores qu’a provocat expropriacions de terrens as sòns proprietaris, es recorsi naturaus s’an agotat e era gent non pòt cap tornar ara pagesia, era poblacion s’a tornat de mès en mès prauba, es persones immigrades qu’anèren a trabalhar ath servici deth torista qu’an perdut eth trabalh; en definitiua, s’a produsit ua grèu crisi sociau ath delà dera crisi economica. Enes endrets a on era lengua e cultura territoriau ei ua lengua minorizada an perdut era sua identitat en favor des lengües e cultures dominantes. Un exemple de tot açò n’ei era còsta valenciana.

Era destruccion deth miei ena Val d’Aran non ei sonque en procès de comportar un caòs economic e sociau, era nòsta lengua recule e era beutat deth nòste païsatge, maximala atraccion toristica, ei en perilh.

Segontes informe eth jornau “El País” ena sua edicion de 23 de març, eth plan urbanistic dera Val d’Aran qu’ei estat modificat peth govèrn dera Generalitat de Catalonha, en tot dar-ne eth contraròtle as ajuntaments. Precisaments es ajuntaments son es entitats politiques mès faciles de corrómper per part des màfies dera construccion. Aguesta modificacion deth plan urbanistic que met en perilh eth nòste petit país qu’a vengut a instàncies des ajuntaments de Naut Aran e de Vielha. Non ei cap edart qu’era enterpresa Catalana Occidente, participaira deth grop Baqueira-Beret, age finançat era fondacion de Convergéncia Democratica de Catalonha.

Libertat! Esquèrra Revolucionària d’Occitània que reclamam alternatiues d’emplec e un plan urbanistic que mos protegisque dera especulacion, dera desolacion, e dera desculturizacion. Volem víuer en país!

 

Libertat! Esquèrra Revolucionària d’Occitània, Val d’Aran, 24 de març de 2011

NUCLEAR? QUE NON!

Japon que coneish aguest mes de març un periòde fòrça dolent. Eth tsunami creat per un tèrratrem submarin qu’a devastat es còstes damb un considerable nombre de victimes.
Dempús d’aquera catastròfa naturau arribe eth debat dera energia nucleara. Eth desastre qu’a tocat Japon qu’a causat un accident important ena centrau de Fukushima en nòrd-èst dera isla. En dia d’aué èm plan inquiets per çò qu’ei des risqui de radiacions dera poblacion que viuen en aqueth parçan.

Coma soent passe quan s’agís de nuclear, es autoritats qu’amaguen informacion e que sagen de minimizar es conseqüéncies d’aquera catastròfa.

Libertat, coma d’autes organizacions que s’opausen ara energia nucleara, non a cap demorat aqueth accident dera centrala entà exigir er abandonament totau dera energia nucleara sus eth planèta. Eth triste exemple de Fukushima qu’ei era pròva qu’er emplèc dera energia nucleara compòrte risqui que non se pòden cap dominar. Libertat que torne a afirmar atau era sua oposicion radicau ara energia nucleara. D’auti mejans de crear energia son possibles e cau desvolopar-les lèu-lèu.

Nuclear, non gràcies! Ne en Occitània, ne enlòc!