Que constatam qu’es atacs ara immersion lingüistica en catalan enes escòles de Catalonha, se reviren en atacs ara immersion lingüistica en occitan aranés ena Val d’Aran.

Que denonciam era actitud antidemocratica e de manca de respècte d’aguest grop minoritari envèrs eth consens artenhut pes granes majories sociaus en matèria de politica lingüistica.

Que consideram qu’aguesti individus empleguen eth poder judiciau entà arténher objectius politics que no an arren a veir damb era convivéncia ne damb era coesion sociau.

Que demanam ath Govèrn dera Generalitat de Catalonha que non hèsque cap de pas tà darrèr ena defensa deth catalan coma lengua veïculara enes escòles de Catalonha atau coma der occitan coma lengua veïculara enes escòles dera Val d’Aran.

Qu’exigim ath Govèrn d’Aran, qu’en cas qu’era Generalitat de Catalonha cedisque ara pression politica e judiciau espanhòla, declare unilaterauments era independéncia dera Val d’Aran, pr’amor qu’era separacion d’Espanha serà era manèra de mantier viua era nòsta lengua e era nòsta occitanitat.

 Libertat! Esquerra Revolucionària d’Occitània, seccion Val d’Aran, 3 de seteme 2011

Deuant d’aguest nau atac ara dignitat deth pòble aranés e de tot eth pòble occitan, Libertat! Esquèrra Revolucionària d’Occitània que denonciam eth prigond caractèr antidemocratic deth govèrn espanhòu, que sollicitam ara societat civiu occitana e en pòble occitan a mobilizar-se deuant des agressions que coma pòble patim. Qu’exigim tanben ua responsa digna per part des institucions catalanes, araneses e deth rèste d’Occitània.

Libertat! Esquèrra Revolucionària d’Occitània 22 de junhsèga de 2011

Eth 24, 25 e 26 de junh Libertat! organize un hestenau en Montcuc (Carcin) damb concèrts, desbats… tà saber-ne mès visitatz era plana oèb: www.festenalmontcuc.org

PER UN PAÍS VIU E COMBATIU, TOTI E TOTES AMASSA EN MONTCUC!

Eth proplèu dia 22 de mai de 2011 se celebraràn es eleccions as municipis e ath Conselh Generau ena Val d’Aran. Libertat! Val d’Aran que valoram fòrça positiu eth hèt d’auer arrecuperat es nòstes institucions e creiguem qu’eth Conselh Generau a de devier era institucion màger de representacion deth pòble aranés. Tà nosati, donques, s’agís d’ua jornada clau entà decidir quin serà eth futur dera Val d’Aran enes proplèus quate ans e ei per aquerò que mos cau préner consciéncia entà saber a on volem arribar e qué mos cau hèr entà artenhé’c.

Maugrat era alegria d’auer recuperat es nòstes institucions, auem eth sentiment que non èm cap un pòble liure; eth hèt qu’aguestes eleccions coïncidisquen damb es municipaus e bères autonomiques der estat espanhòu, e eth hèt qu’es partits que s’i presenten siguen subsidiaris de partits catalans e espanhòus, qu’impedís era emancipacion deth pòble aranés en sòn encastre nacionau occitan.

Ath delà, Libertat! non èm per aguest sistèma de democràcia, ena que quauqui escuelhuts hèn e des·hèn e eth pòble sonque a era escadença de votar-les o non cada quate ans. Libertat! qu’apostam mès per ua democràcia participatiua ena que totes e toti pogam participar des decisions qu’es nòstes institucions prenguen. Non volem tornar ath sistèma d’inseculacion, mès òc que volem tornar as vediaus!

Libertat! qu’ei un movement de quèrra anticapitalista que promò alternatiues economiques que non van guaire luenh dera organizacion sociau des aranesi pendent es tempsi dera Querimònia. Cau rebrembar que toti es bòsqui, arrius, prats e montanhes èren proprietat de toti es aranesi e toti ne podien hèr usatge. I podien pèisher es arramades, arrecuélher lenha, pescar e caçar a liura volontat. Ath delà, se respectauen es pròpies leis, hètes per consens mercés ar armari des sies claus, sustot en çò que tanh a successions e impòsti. Eth pòble administraue era seguretat e era justícia. Auem passat de patac d’un socialisme pionèr a un capitalisme extrèm.

Libertat! Val d’Aran qu’apiejaram ua lista qu’age en programa quauqui punts que nosati consideram basics e de besonh:

• Recuperacion deth país tath pòble damb un foment dera produccion locau.

• Proteccion deth miei ambient: que non mos destrossen eth país damb autopistes, camps de gòlf, complèxes otelèrs de luxe tà toristes milhonaris e macrourbanizacions de luxe, qu’ath delà d’abandonades, destròssen eth país, prenen tèrres ara pagesia e ara ramaderia, e agoten es recorsi naturaus, era flora e era fauna de montanha.

• Foment deth cooperativisme per dessús des enterpreses. Açò non ei sonque ua valor dera politica sociau de quèrra, mès tanben ua volentat d’apropar-mos ara organizacion sociau dera Val d’Aran dera Querimònia.

• Politiques pensades mès tara gent deth país que tath torisme. Cap de retalhada sociau, mès que mès en ensenhament e en santat.

• Alternatiues economiques ath torisme sense eliminar-lo mès hènt que non sigue era soleta hònt de sòs dera Val d’Aran.

• Emancipacion nacionau occitana: èm un país occitan e exigim un ensenhament dera totalitat dera lengua occitana en estudi, demanam un foment e ua promocion entà que tant en estudi coma dehòra se dongue a conéisher eth rèste deth país, volem que se priorize es professors occitans as espanhòus e catalans enes escòles e en institut, volem un transpòrt public que mos comunique damb eth rèste d’Occitània. Volem accès a tota sòrta de productes hèti en Occitània.

• Possibilitat de hèr estudis superiors ena Val d’Aran o pròp, en país, sense besonh d’emigrar.

• Alternatiues de léser entàs joeni: casals, centres civics e tota sòrta d’equipaments publics entà qu’es joeni poguen amassar-se, associar-se e organizar-se.

• Cap de foment dera xenofobia ne deth racisme. Eth capitalisme extrèm a portat a persones immigrades tara Val d’Aran, e sonque es que s’an hèt mès rics en treir-ne profit dera misèra des auti son es responsables des crisis sociaus qu’aquerò pogue provocar. Tot abitant dera Val d’Aran ei aranès, se vò.

• Cap sòrta de discriminacion per sèxe ne per opcion sexuau.

Per manca d’ues listes electoraus que contenguen aguesti minims que Libertat! cre de besonh, non podem dar cap de supòrt a cap des listes que se presenten. Totun, que convidam as politics aranesi a tier en compde es nòstes prepauses.

 Libertat! Esquèrra Revolucionària d’Occitània, Val d’Aran,  mai de 2011

Guardem qué a passat en d’autes zònes toristiques desprotegides deth creishement descontrarotlat: era corrupcion des ajuntaments per part d’enterpreses especuladores qu’a provocat expropriacions de terrens as sòns proprietaris, es recorsi naturaus s’an agotat e era gent non pòt cap tornar ara pagesia, era poblacion s’a tornat de mès en mès prauba, es persones immigrades qu’anèren a trabalhar ath servici deth torista qu’an perdut eth trabalh; en definitiua, s’a produsit ua grèu crisi sociau ath delà dera crisi economica. Enes endrets a on era lengua e cultura territoriau ei ua lengua minorizada an perdut era sua identitat en favor des lengües e cultures dominantes. Un exemple de tot açò n’ei era còsta valenciana.

Era destruccion deth miei ena Val d’Aran non ei sonque en procès de comportar un caòs economic e sociau, era nòsta lengua recule e era beutat deth nòste païsatge, maximala atraccion toristica, ei en perilh.

Segontes informe eth jornau “El País” ena sua edicion de 23 de març, eth plan urbanistic dera Val d’Aran qu’ei estat modificat peth govèrn dera Generalitat de Catalonha, en tot dar-ne eth contraròtle as ajuntaments. Precisaments es ajuntaments son es entitats politiques mès faciles de corrómper per part des màfies dera construccion. Aguesta modificacion deth plan urbanistic que met en perilh eth nòste petit país qu’a vengut a instàncies des ajuntaments de Naut Aran e de Vielha. Non ei cap edart qu’era enterpresa Catalana Occidente, participaira deth grop Baqueira-Beret, age finançat era fondacion de Convergéncia Democratica de Catalonha.

Libertat! Esquèrra Revolucionària d’Occitània que reclamam alternatiues d’emplec e un plan urbanistic que mos protegisque dera especulacion, dera desolacion, e dera desculturizacion. Volem víuer en país!

Libertat! Esquèrra Revolucionària d’Occitània, Val d’Aran, 24 de març de 2011

Coma soent passe quan s’agís de nuclear, es autoritats qu’amaguen informacion e que sagen de minimizar es conseqüéncies d’aquera catastròfa.

Libertat, coma d’autes organizacions que s’opausen ara energia nucleara, non a cap demorat aqueth accident dera centrala entà exigir er abandonament totau dera energia nucleara sus eth planèta. Eth triste exemple de Fukushima qu’ei era pròva qu’er emplèc dera energia nucleara compòrte risqui que non se pòden cap dominar. Libertat que torne a afirmar atau era sua oposicion radicau ara energia nucleara. D’auti mejans de crear energia son possibles e cau desvolopar-les lèu-lèu.

Nuclear, non gràcies! Ne en Occitània, ne enlòc!

Que s’arremassèren mès d’un milion de signatures en ua Inciatiua Legislatiua Populara (ILP) entà assegurar era recepcion des televisions entre es territòris que compartissen era madeisha lengua, qu’actuauments se tramite en parlament der estat espanhòu. Dempús deth moment dera presentacion dera ILP, era persecucion deth govèrn valencian contra ACPV a creishut de manèra desproporcionada, damb era imposicion de dues multes de 600.000 èuros.

Recentaments, eth govèrn valencian a aprovat era modificacion d’ua lei que declare illegaus es emissions de TV3, damb aguesta modificacion se pòden méter punicions de 60.000 èuros cada quinze dies a ACPV.

Eth ser de dijaus 17 de hereuèr, era freqüéncia de Tv3 quitèc d’arreceber-se en País Valencian.

Libertat! que manifestem era nòsta indignacion per aguest hèt e manifèstam eth nòste supòrt a Acció Cultural del País Valencià. Be s’agís d’un atac ara libertat d’expression, ara liura circulacion dera cultura, ath pòble e ara lengua catalana.

Qu’exigim que se reprenen de manèra legau, es emissions dera Television de Catalonha en País Valencian, e demanam estener-ne era recepcion per tota Occitània.

Libertat! Esquèrra Revolucionària d’Occitània, 18 de hereuèr 2010

Sabents dera trajectòria deth Tribunau Constitucionau espanhòu e d’autes institucions pariones ath servici der imperialisme espanholista, temem ua solucion nefasta e ua retalhada dera unica lei que defen es nòsti drets lingüistics.

Ath delà, er estat francés non dobtarà en utilizar aguest recors e era decision deth Tribunau Constitucionau espanhòu entà justificar mès encara es constants atacs ara lengua occitana e culminar era sua politica lingüicida. Consideram, donques, qu’era badinada d’aguesti quate aprendissi de neolerrouxisme, pòt vier era agression mès fòrta que jamès age arrecebut era lengua occitana.

Fòrces politiques occitanes coma Libertat! e eth Partit Occitan participèrem actiuaments ena manifestacion deth dia 10 de junhsèga en Barcelona. Maugrat qu’era nòsta aportacion siguec modèsta, siguec era nòsta solidaritat internacionalista e mès que mès es ligams que mos junhen damb eth pòble catalan, çò que mos possèc a desfilar pes carrèrs de Barcelona.

Per tot açò Libertat! Esquèrra Revolucionària d’Occitània:

·     remèrque qu’era Lei der occitan, aranés en Aran ei ua lei deth Parlament de Catalonha

·      arregraís era sensibilitat lingüistica des institucions catalanes envèrs era lengua occitana

·      condemne er imperialisme demagogic dera dreta espanholista e es sòns atacs as lengües catalana e occitana

·     demane a totes es fòrces politiques, sindicats, institucions e entitats dera Val d’Aran e dera Occitània grana a èster premanidi entà arrespóner de manèra unitària aguesta agression

·      apère ara solidaritat de totes es fòrces politiques, sindicats e institucions des Païsi Catalans deuant d’aguesta agression

Libertat! Esquèrra Revolucionària d’Occitània, 7 de gèr de 2011