Participacion de Libertat! ena manifestacion deth 31 de març en Tolosa

6 Abr

Occitània Antifascista

3 Abr

Communicat de Libertat! 


La manifestacion de Tolosa qu’estó ua escaduda sus numerós punts. Totun, d’autas hèitas vienen ennegrir aquera jornada e un còp mei los identitaris nos muishèn la lor cara e la lor vision sectària e retrograda de l’Occitània qu’emparan ! Atau, a maugrat de l’arrefús de l’organizacion de’us véder dens lo cortègi, los identitaris ne s’estanquèn pas d’ensajar d’i accedir, en van !

Benlèu decebuts pr’amor de l’unitat deus occitans dens la volontat de deféner ua Occitania obèrta, mestissa e toleranta, los identitaris que volón har mòstra de la lor violéncia e de la lor hasti en tot atacar lo barri cosmopolita de Naut Bernard. Mes la resisténcia sus plaça èra plan presenta, e los identitaris e lor ideologia pudenta qu’estón hòrabandits deu barri e “menats” dinc au lor repèra.

 

Totun, la polícia, aparelh de l’estat francés, a causit, un còp mei, de préner partit peus identitaris, e çò a maugrat de las numerosas provocacions d’aqueths : que son plan militants antifascistas qu’estón contraròtlats e per daubuns interpellats, l’un d’entre eths sorteish d’aulhors a pena de guarda a vista, e çò a maugrat deu hèit que los identitaris ajan deishat un òmi a tèrra (es totjorn a l’espitau) dens lo barri Naut Bernart.

Brembam que l’Occitània es e serà totjorn mestissa. Pr’amor de son istòria, pr’amor de sa situacion actuau, Occitània ne’s pòt pas conjugar dab valors racistas e demorarà ua tèrra d’arcuelh e de paratge ! Ne deisharam pas los identitaris raubar los sons simbèus, la soa identitat, ni desvirar las soas valors.

A LIBERTAT !denonciam donc aqueth faus-semblant de « justícia ».

Tanben, LIBERTAT ! que crida clarament la soa solidaritat dab l’Union Antifascista tolosana , los companhs vienuts d’Occitània tota e mei enqüèra dab lo companh arrestat ! Que pensam hòrt ad eth uei, e que’u portam tot lo nòste sosten en tot esperar ua fin melhora, mes sustot mei logica ad aquera situacion completament capvirada cap a las hèitas atau com estón viscudas !

Crida tà manifestar damb Libertat! Eth 31 de març: Toti en Tolosa

21 Mar

Eth 31 de març se debanarà era manifestacion « Anem òc per la lenga occitana » en Tolosa. En 2009, en Carcassona, qu’èrem 25.000 persones tà reclamar un dret pera lengua occitana. Aué, ua nauèra manifestacion qu’ei prepausada tà reclamar un aute còp aguest dret a un Estat francés jacobin e centralista, atau coma eth Estat espanhòu e italian.

Se Libertat defen e promò era lengua e era cultura occitana, que mos demanam sus era manca evidenta de hons entad aguesta manifestacion. Ua manifestacion tà demanar a uns estats que non son dispausadi a conéisher era existéncia deth pòble occitan. ua manifestacion pendent era quau des·hilaram darrèr d’ua còlha d’elegits e de personalitats politiques, que vien aciu tà hèr eth sòn hons de comèrç e amassar mès votzes eth dia abans des eleccions. Que refusam de servir es sòns interèssi. Aguesta manifestacion qu’ei abans tot era d’un pòble, deth pòble occitan, des persones que viuen sus aguest territòri e que se’n senten. Aquesta manifestacion qu’ei tanben era ocasion de mostrar que podem estar ua fòrça dinamica, que n’èm cap mòrti e que non entraram pas en sòn jòc electoralista. pr’amor, siguem clars, arren non cambiarà tàs lengues e es pòbles der Estat francés, espanhòu e italian eth dia despús des eleccions. Arturem de créder en aguestes quimères e amassa bastim era nòsta fòrça. Toti que deuem auançar ath darrèr der eslogan « Víuer e decidir en país ». Non volem cap mès guardar entà París, Madrid o Roma, cap a totes aqueres persones que destrusissen es nòsti territòris, que volem bastir alternatiues ad aqueth sistèma en çò nòste e prepausar projèctes locaus, damb eth respècte as persones que i demoren.

Qu’ei en aqueth sens que s’a de bastir aguesta manifestacion. Auançar sus proposicions sociaus e un projècte politic coerent.

Per açò :

  • Que reclamam era reconeishença deth pòble occitan.
  • Que volem qu’es nòsti païsi non siguem destrusidi per grani projèctes ferroviaris,  autorrotèrs, grani projèctes toristics, horadatges peth gas d’esquist, eca…
  • Que reclamam era reconeishença  totau dera nòsta lengua e era sua promocion: immersion lingüistica…
  • Que reclamam eth dret tàs nòsti joeni de víuer, trabalhar en país e ena lengua.

Era emancipacion deth pòble occitan non resultepas d’ua lei, que ven dera sua capacitat de bastir projèctes alternatius, entà acabar damb ua societat que cada dia assassine, escludís, discrimine. Que volem bastir ua Occitània populara, en acabant damb es discriminacions. Non desbrembem qu’era nòsta cultura a sabut daurir-se as auti tà bastir-se, fòrça soent aguesta construccion qu’a estat desbrembada e qu’auem coneishut ores sombres. Mès eth pòble occitan qu’a de tornar a apréner era sua istòria, tornar a trobar es origines dera sua cultura, era sua istòria tà auançar e tornar a bastir-se.

Qu’auem  tanben de refusar era participacion des fascistes en aguesta manifestacion. Qu’arrefusam era sua vision d’ua Occitània embarrada sus era madeisha, Aquestes persones non an cap comprenut arren dera istòria d’Occitània. Qu’èm ua tèrra d’acuelh e fòrça des nòstes viles son estat creades mercés ara mesclanha des pòbles. Açò ei era nòsta riquesa. E qu’auem d’apréne cada dia un shinhau mès d’aguesta mesclanha. Qu’auem d’impedir-les de manifestar aguest dia e mostrar-les que non pòden cap vier en tota impunitat a propagar es sues idies discriminatòries, xenofòbes e sexistes.

Libertat que formarà un seguici pendent aquesta manifestacion tà hèr valer totes aguestes idèe e perpausar un aute projècte politic.

Qu’aperam a totes es fòrçes presentes a junher-mos en aguest seguici. 

Toti amassa en Tolosa tà VÍUER E DECIDIR EN PAÍS !

PES NÒSTES TRADICIONS DIGUEM NON ATH PAIR NADAU

12 Dec
Era Soca de Nadau, coneishuda tanben en d'auti parçans d'Occitània coma 
Soc de Nadau o Cachafuòc, ei ua des tradicions occitanes qu'acompanhen 
era celebracion des hèstes de Nadau. S'agís dera part baisha d'un soc 
qu'en Aran ei normauments de hai, e en d'auti lòcs d'Occitània qu'ei de 
cerdièr, d'olivèr o de perèr. Ancianament se boçaue era Soca damb ua 
flaçada e era net de Nadau ère portada tath huec peth mès gran e peth mès 
de petit dera familha. Era Soca auie de demorar alugada enquiath dia des 
aninòs.

Actuauments ei costum enes cases de hèr a cagar ara Soca presents e doci 
damb ua cançoneta.

Ena Val d'Aran es mès petiti que canten:

"Caga soca, soca de Nadau;
non cagues arengades, que son salades.
Caga torron,
e pisha vin blanc."

I a tantes versions dera cançoneta coma parçans a Occitània. Ací qu'auem 
er exemple dera cançoneta des Cevenes:

"Bota fuòc, cachafuòc,
que nos alegre,
que nos fague la jòia d’èstre aquí l’an que ven,
e se sèm pas mai,
que siaguem pas mens!"

Darrèrament qu'auem arremercat ua invasion de pairs Noël en nòste país. 
Mès qu'ua invasion culturau e ua agression as nòstes tradicions, qu'ei 
frut d'ua estrategia comerciau. Se pèrden es valors de fraternitat e 
solidaritat entre individus e pòbles. Reauments pensatz qu'es vacances 
de Nadau servissen entà guanhar sòs?

Demanam ath Conselh Generau d'Aran, e a toti es Ajuntaments dera Val, 
que per un moment se senten mès aranesi que comerçants de sòs e 
s'impliquen un shinhau mès ena nòsta cultura e enes nòstes valors 
solidàries, eretières des tempsi des Vediaus. Les prepausam que càmbien 
es pairs Noël per Soques de Nadau e hèsquen campanha entà qu'en cada 
casa aranesa i age ua Soca de Nadau e eth 1r de gèr toti se desiren "bon 
jorn des aninòs"!

Prepausam tanben que pes megafonies des zònes comerciaus se senten 
nadalets occitans. Era produccion musicau deth nòste país, des Alps as 
Pirenèus, ei fòrça grana e sufisenta. Ja n'i a pro d'èster subsidiaris 
des cultures catalana e espanhòla.

Libertat! Esquèrra Revolucionària d'Occitània, seccion Val d'Aran, Nadau 
de 2011

COMUNICAT DE LIBERTAT! CONTRA ERA SUSPENSION DERA LEI DER OCCITAN, ARANÉS EN ARAN.

19 Set
Eth Tribunau Constitucionau espanhòu (TC) qu'a admetut a tramit eth recors deth govèrn espanhòu contra era 
lei der occitan,aranés en Aran. Per aquerò n'a suspenut era sua aplicacion e laguens un termini de cinc mesi
eth TC ratificarà o treirà. Eth TC qu'a enviat es documents ath Congrès des Deputats, ath Senat espanhòu, ath
Govèrn e ath Parlament de Catalonha, qu'an quinze dies entà personar-se en procès e formular es allegacions 
que considèren oportunes.

Eth govèrn espanhòu recorrec aguesta lei eth passat mes de junhsèga. Eth govèrn de José Luís Rodríguez Zapatero 
se basaue ena senténcia contra er Estatut d'Autonomia de Catalonha deth TC entà impugnar diferenti articles dera
lei dera nòsta lengua pr'amor que considerèc qu'ère inconstitucionau autrejar ar occitan un caractèr preferent 
ena Val d'Aran. Eth Partit Popular, qui inicièc eth recors contra er estatut de Catalonha a on se declare era 
oficialitat dera nòsta lengua, se base er eth article 3.1 dera Constitucion, a on er espanhòu ei era lengua 
oficiau der Estat.

Auem, donques, un atac ara soleta lei que protegie era nòsta lengua ena Val d'Aran e ena comunitat autonòma de
Catalonha, inspirat en recors anticatalan deth PP, mès amiat a tèrme peth PSOE.

Era Lei der occitan, aranés en Aran qu'ei ua lei deth Parlament de Catalonha. Alavetz, non s'agís sonque d'un 
atac contra era Val d'Aran e Occitània en generau e tanben contra Catalonha.

Libertat! Esquèrra Revolucionària d'Occitània demanam as govèrns de Catalonha e Aran qu'arriben enquiàs darrères
conseqüéncies entà preservar era nòsta legalitat lingüistica, se cau, en tot partir d'Espanha.

Qu'exigim tanben era trencadura immediata de relacions des partits aranesi damb aguesti dus partits espanholistes
qu'ataquen er aranés, ei a díder es relacions qu'Unitat d'Aran a damb eth PSOE e es pactes que 
Convergéncia Democratica Aranesa a damb eth PP.

NON ARA CONSTITUCION ESPANHÒLA, ÒC ARA QUERIMÒNIA!

Libertat! Esquerra Revolucionària d’Occitània, seccion Val d’Aran, 19 de seteme 2011

COMUNICAT DE LIBERTAT VAL D’ARAN PER RAPÒRT AR ULTIMATUM DETH TSJC

3 Set

Libertat! Val d’Aran que refusam er ultimatum deth Tribunau Superior de Justícia de Catalonha (TSJC) per çò qu’ei der usatge deth castelhan coma lengua veïculara en estudi e que lamentam qu’era justícia contunhe d’avalar era persecucion deth modèl escolar de Catalonha e Aran, qu’ua petita minoritat d’individus amie a tèrme contra eth modèl lingüistic escolar.

Que constatam qu’es atacs ara immersion lingüistica en catalan enes escòles de Catalonha, se reviren en atacs ara immersion lingüistica en occitan aranés ena Val d’Aran.

Que denonciam era actitud antidemocratica e de manca de respècte d’aguest grop minoritari envèrs eth consens artenhut pes granes majories sociaus en matèria de politica lingüistica.

Que consideram qu’aguesti individus empleguen eth poder judiciau entà arténher objectius politics que no an arren a veir damb era convivéncia ne damb era coesion sociau.

Que demanam ath Govèrn dera Generalitat de Catalonha que non hèsque cap de pas tà darrèr ena defensa deth catalan coma lengua veïculara enes escòles de Catalonha atau coma der occitan coma lengua veïculara enes escòles dera Val d’Aran.

Qu’exigim ath Govèrn d’Aran, qu’en cas qu’era Generalitat de Catalonha cedisque ara pression politica e judiciau espanhòla, declare unilaterauments era independéncia dera Val d’Aran, pr’amor qu’era separacion d’Espanha serà era manèra de mantier viua era nòsta lengua e era nòsta occitanitat.

 

 Libertat! Esquerra Revolucionària d’Occitània, seccion Val d’Aran, 3 de seteme 2011

COMUNICAT DE LIBERTAT! DAUANT DER ATAC ARA LENGUA OCCITANA DETH CONSELH DE MINISTRES ESPANHÒU

23 Jul

Eth conselh de ministres deth govèrn espanhòu, dirigit per José Luis Rodríguez Zapatero, qu’a acordat aué, dia 22 de junhsèga, de sollicitar ath Govèrn dera Generalitat de Catalonha era interpausicion d’un recors d’inconstitucionalitat dera Lei der occitan, aranés en Aran.

Deuant d’aguest nau atac ara dignitat deth pòble aranés e de tot eth pòble occitan, Libertat! Esquèrra Revolucionària d’Occitània que denonciam eth prigond caractèr antidemocratic deth govèrn espanhòu, que sollicitam ara societat civiu occitana e en pòble occitan a mobilizar-se deuant des agressions que coma pòble patim. Qu’exigim tanben ua responsa digna per part des institucions catalanes, araneses e deth rèste d’Occitània.

Libertat! Esquèrra Revolucionària d’Occitània 22 de junhsèga de 2011