Èster omosexuau non ei bric aisit. Semble qu’era nòsta societat non tròbe pas tan simple er hèt de respectar era libertat de cadun a estimar coma mès li shaute. Que cau arribar a ua normalitat sociau ena que toti poderam exprimir-mos e víuer damb libertat, independentament deth color dera pèth, deth gènre o dera orientacion sexuau. Aguesta luta qu’auance en tot arténher quauqui drets, mès encara demoram çò de mès complicat: era normalizacion sociau.
Maugrat que i a associacions que pòrten mès de 30 ans en tot lutar pes drets des omosexuaus, en tot generar un ideari e un discors fòrça coerent e respectable; era luta s’a desvirtuat pes interèssi d’un aute sector, eth comerciau, qu’a convertit eth mon gai en un negòci.
Enes principaus ciutats deth mon capitalista e occidentau s’i tròben barris que son vertadèrs ghettos. Se tracte de barris enes que s’i concentren un gran nombre de negòcis orientadi ath mon gai en ua vision totaument masclista: tot son botigues sonque tà gojats. Aguestes zònes son plees de bars gais, otèls gais, negòcis gais, saunes gais… Quitament en tot arribar ar extrèm qu’èster gai a non ei cap ua opcion sexuau mès que s’a convertit en ua mèrca e en un negòci… e lèu lèu en ua mòda.
Deth 7 ath 14 de hereuèr s’organize ena Val d’Aran era dusau setmana Valdarangay, ua setmana d’esquí, activitats, léser, espòrt e relax entà gent gai. Entà gent gai damb sòs. Un programa plan farcit d’activitats, a on er occitan non i é bric present, a on es occitans gais auràn de cambiar as lengües des poderosi: eth castelhan e er anglés.
Que trobam ua contradiccion er hèt de voler egalitat de drets e propiciar activitats entà gais. Que credem que calerie lutar entara normalizacion der hèt omosexuau, mès semble qu’aqueri que viuen deth ghetto gai ja les interèsse que jamès non s’artenhe cap era egalitat sociau.
Urosament non toti es gais e lesbianes entren en aguest estereotip, ne tanpòc hèn vida en aguesti ambients. Sonque son liures es gais e es lesbianes qu’eviten aguesta mercantilizacion dera sua luta sociau.