Comunicat des Plataformes de supòrt en Estat Espanhòu.
Era recenta senténcia dera Audiéncia Nacionau qu’absòlv as jutjadi d’ues grèus acusacions que pesauen contra eri, e que dèishe en fòrça mau lòc ath jutge instructor e ara Guardia Civil, que bastiren supausades pròves damb era unica fin de clausurar eth jornau.
An passat 7 ans qu’es jutjadi an sofrit tortures, ans de preson, acusacions sense cap de fondament, granes pèrtes economiques. Es trabalhadors deth diari perderen eth sòn lòc de trabalh, e era societat basca se vedec privada deth dret a arrecéber informacion ena sua pròpria lengua. Des d’ací qu’exigim er apariament e indemnizacion per toti es damatges causadi pes poders publics e qu’es persones qu’apliquèren de forma illegau ua legislacion injusta assumisquen es sues responsabilitats.
Era senténcia desautorize ara Delegacion deth Govèrn en Madrid, que proïbic ua manifestacion damb eth lèma “Pera libertat d’expression, contra eth barrament deth jornau Egunkaria” per considerar qu’auie ua fin illicita, e tanben ath Tribunau Superior de Justícia de Madrid que ratifiquèc aguesta proïbicion. Ambdues institucions an d’arreconéisher damb claretat eth grèu error cometut e eth damatge causat as convocaires, en tot includir es còsti deth recors, o en cas contrari demissionar.
Trist ròtle, eth qu’an exercit era majoria des responsables de crear opinion publica, qu’an condemnat pendent aguesti 7 ans, sense demorar era senténcia deth tribunau, e que criminalizen tota mòstra de solidaritat, mès que mès entara luta deth pòble basc. Mès non semblen pas render-ne compde, pr’amor que, un aute còp, en operacions realizades aguesti madeishi dies, tornen a assumir coma unica version e veritabla era qu’aufrissen es còssi policèrs, en tot s’en fóter dera pressumpcion d’innocéncia des persones afectades.
Pr’amor que mos preocupe çò que passe ath nòste entorn e pr’amor qu’a totes e a toti mos afècte eth retalh des libertats, ei per açò qu’auem volut contribuïr damb era nòsta movilizacion ath restabliment des drets alebadi, e mos sentem capinauti d’aué’c artenhut entre toti. Mès sabem que non podem pas abandonar era luta, donques fòrça persones contunhen de sofrir es conseqüéncies dirèctes d’aguesti atacs as sòns drèts civius cometudi per uns poders publics que, en lòc d’èster ath servici dera ciutadania, ena majoria des casi actuen en defensa des interèssi des poderosi, en tot emparar-i es sues injustícies.
Era solidaritat entre es pòbles qu’ei un déuer entà totes es persones qu’aspiren a un mon en patz e damb justícia sociau. Es persones e organizacions qu’auem lutat entà que se hèsque justícia damb Egunkaria e es sòns jutjadi, contunharam de lutar per aguesti valors, aquiu a on mos trobesquem, e n’animam as qui compartisquen aguestes aspiracions.
Semble qu’auem arribat ara fin (en demora de possibles recorsi) d’ua malajadilha que jamès auie d’auer començat. Demoram qu’aguesta senténcia pogue significar eth punt finau d’ua politica de repression generalisada que non a pas alebat pòqui drets, emparada en emplec e abús d’ua legislacion excepcionau e injusta. Ua legislacion que, desvolopada jos eth pretèxte dera luta antiterrorista, a dat lòc, entre d’auti atacs inconstitucionaus as drets sociaus, a barraments d’auti mejans de comunicacion coma Egin, Egin Irratia e Ardi Beltza, e que s’aplique, de mès en mès, contra quin broton que sigue de disidéncia per çò qu’ei deth poder establit per tot er Estat Espanhòu.
Que volem qu’aguesta senténcia contribuïsque tanben a alucar un futur d’esperança e de patz, basada en dret des pòbles a decidir eth sòn futur e a desvolopar era sua cultura e valors pròpris.
ÒSCA ARA SOLIDARITAT ENTRE ES PÒBLES!
EGUNKARIA AURRERA!
Plataformes de supòrt a Egunkaria de Saragossa, Valladolid, Astúries, Catalonha e Madrid – Abriu 2010
LIBERTAT! VAL D'ARAN 